📚 ມະຫາວິທະຍາໄລຈໍາປາສັກ ຈັດກອງປະຊຸມເຜີຍແຜ່ຜົນສໍາເລັດຂອງກອງປະຊຸມທົ່ວໄປຄັ້ງທີ 5 ຂອງໂຄງການ REAL ແລະ ແຜນກິດຈະກໍາຕໍ່ໄປຂອງໂຄງການ REAL, ພ້ອມການສໍາມະນາຍົກລະດັບຄຸນນະພາບການສຶກສາຊັ້ນສູງ

 ໃນວັນທີ 13 ຕຸລາ 2026, ມະຫາວິທະຍາໄລຈໍາປາສັກ ໄດ້ຈັດກອງປະຊຸມເຜີຍເເຜ່ຜົນສໍາເລັດຂອງກອງປະຊຸມທົ່ວໄປຄັ້ງທີ 5 ຂອງໂຄງການ REAL. ຈຸດປະສົງຂອງກອງປະຊຸມເເມ່ນເພື່ອເຜີຍແຜ່ຜົນສໍາເລັດ, ລາຍງານຄວາມຄືບໜ້າ ແລະ ປຶກສາຫາລືກ່ຽວກັບແຜນກິດຈະກໍາໃນຂັ້ນຕໍ່ໄປຂອງໂຄງການ. ພ້ອມກັນນີ້ ຍັງໄດ້ຈັດການສໍາມະນາພາຍໃຕ້ຫົວຂໍ້ “Linking Learning Outcomes with Full Student Workload as a Key Element in Internal Quality Assurance (IQA)”.

ກອງປະຊຸມພາກເຊົ້າ ໄດ້ເນັ້ນການແລກປ່ຽນຄວາມຄືບໜ້າຂອງໂຄງການ, ການເພີ່ມຄຸນຄ່າຂອງການສຶກສາຊັ້ນສູງ, ຮ່າງມາດຕະຖານຫຼັກສູດແຫ່ງຊາດສະບັບໃໝ່, ການຮ່ວມມືກັບຜູ້ມີສ່ວນກ່ຽວຂ້ອງ ແລະ ການວາງແຜນກິດຈະກໍາຕໍ່ໄປ ເພື່ອສົ່ງເສີມການພັດທະນາຄຸນນະພາບການສຶກສາຊັ້ນສູງໃນ ສປປ ລາວ.

ສ່ວນການສໍາມະນາພາກບ່າຍ ໄດ້ເນັ້ນການເຊື່ອມໂຍງຜົນການຮຽນຮູ້ຂອງລາຍວິຊາ (CLOs) ກັບຜົນການຮຽນຮູ້ຂອງຫຼັກສູດ (PLOs), ການປະເມີນ ແລະ ຕິດຕາມພາລະການຮຽນຂອງນັກສຶກສາ ໂດຍຜ່ານການນໍາໃຊ້ Logbook/Diary. ຜູ້ເຂົ້າຮ່ວມໄດ້ຮ່ວມກັນແລກປ່ຽນຄວາມຄິດເຫັນ ແລະ ສະເໜີແນວທາງປັບປຸງເຄື່ອງມືຕິດຕາມພາລະການຮຽນຂອງນັກສຶກສາ.

ກິດຈະກໍາຄັ້ງນີ້ເປັນໂອກາດສໍາຄັນໃນການທົບທວນຜົນງານ, ແລກປ່ຽນປະສົບການ ແລະ ກໍານົດທິດທາງການດໍາເນີນງານໃນຂັ້ນຕໍ່ໄປ ພ້ອມທັງສົ່ງເສີມການນໍາໃຊ້ຫຼັກການຈັດການສຶກສາແບບເນັ້ນຜົນໄດ້ຮັບເປັນຫຼັກ (OBE) ແລະ ການຮັບປະກັນຄຸນນະພາບພາຍໃນ (IQA) ເພື່ອປັບປຸງການຮຽນການສອນຢ່າງຕໍ່ເນື່ອງ.

ມະຫາວິທະຍາໄລຈໍາປາສັກ ຂໍຂອບໃຈທຸກພາກສ່ວນ ແລະ ຜູ້ເຂົ້າຮ່ວມ ທີ່ໄດ້ຮ່ວມຂັບເຄື່ອນໂຄງການ REAL ແລະ ມີສ່ວນຮ່ວມໃນການພັດທະນາຄຸນນະພາບການສຶກສາຊັ້ນສູງໃນ ສປປ ລາວ. 🇱🇦

ຮູບພາບເພີ່ມເຕີມ